ობოლაძის 85 ბარდა
სახეობის სახელწოდება: Pisum sativum L.
ჯიშის სახელწოდება: ობოლაძის 85Pisum sativum 'Oboladze’s 85'
წარმოშობა: სელექციური ჯიშია, გამოყვანილია საქართველოს მიწათმოქმედების ს/კ ინსტიტუტის წყალტუბოს მებოსტნეობის სასელექციო საცდელ სადგურში, სახეობათშორისი ჰიბრიდიზაციით და შემდგომი ჰიბრიდული პოპულაციიდან ინდივიდუალური გამორჩევით (დედა-ჯიში „მნოგოსემიანნი“ შეჯვარებული მამა - ჯიში „კრუპნოპლოდნი“). 1990 წლიდან დარაიონებულია, როგორც საკონსერვო მიმართულების ჯიში.
ჯიშის დახასიათება: საშუალოდ საადრეო ჯიშია, აღმოცენებიდან პარკის პირველ კრეფამდე სჭირდება 130დღე. მცენარე დაბალმოზარდია (სიგრძე 70 სმ). მუხლთაშორისების რაოდენობა ღეროზე - 17-19, ყვავილი თეთრი აქვს, გადაჰკრავს მწვანე შეფერილობა. მტევანი 2-3 ყვავილისაგან შედგება. პარკი სწორია, ბოლოში ოდნავ მოხრილი, პარკის ტიპი ნახევრად სამარცვლეა, პერგამენტის შრე საკმაოდ კარგადაა განვითარებული, ბეწვიანობა ძლიერი. მარცვალი მომრგვალოა, მცირედ დაკუთხული, მოთეთრო-ღია მწვანე შეფერილობის ჭიპი მოყვითალო-თეთრი აქვს. 1000 მარცვლის მასაა 264 გრ, ნატურა - 700 გრ. მწვანე მარცვლის მოსავლიანობაა 15ტ/ჰა. მარცვალში მშრალი ნივთიერება 23,7%, შაქრები 7,68%, სახამებელი 3,42%, ცილები 8,47%, ვიტამინ C 37,5მგ/100გრ.
დღევანდელი მდგომარეობა: დაცულია აგრარული უნივერსიტეტის მცენარეთა გენეტიკური რესურსების ბანკში, ასევე შესაძლებელია, ინახებოდეს რუსეთის ვავილოვის სახელობის მემცენარეობის კვლევით ინსტიტუტში (VIR).
წყაროები: 1. Программа селекционных работ Закавказского комплексного селекционного центра по растениеводству до 1990 года, Тбилиси, 1991г.