დიკა 9–14 ხორბალი
საზოგადო სახელი: ხორბალი
სახეობის სახელწოდება: Triticum carthlicumNevskyi
სახესხვაობის სახელწოდება: Triticum carthlicum var. stamineum Zhuk.
ჯიშის სახელწოდება: დიკა 9–14 - Triticum carthlicum ‘Dika 9-14’
წარმოშობა /გავრცელება/დარაიონების წელი/რეგიონი: გამოყვანილია საქართველოს სასელექციო სადგურის მიერ, წალკის დიკას პოპულაციიდან ინდივიდუალური გამორჩევის მეთოდის გამოყენებით. ჯიში დარეგისტრირებულია 1946 წლიდან.
მოკლე აღწერა: საშუალო ვეგეტაციის ჯიშია, არ რეაგირებს იაროვიზაციაზე, გვალვაგამძლეა და კარგად იტანს ტენსაც. ღერო საშუალო სიმაღლის, საკმაოდ მტკიცე და ჩაწოლისადმი გამძლე. ხასიათდება მაღალი პროდუქტიული ბარტყობით. თავთავი და ფხა თეთრი, შეუბუსავი, პრიალა, თავთავი მკვრივი, სიგრძით 5,5–7 სმ, თავთავზე 15–16 თავთუნია, თავთუნში 2–3 მარცვალი. მაღალ აგროფონზე და ხელსაყრელ კლიმატურ პირობებში თავთუნში ვითარდება 4–5 ნორმალურად განვითარებული მარცვალი. თავთუნის კილი კვერცხისებრია. კილის მხარე ვიწრო და აწეული, ფხასა და მას შორის არის პატარა სამკუთხედი. თავთუნის კბილის კბილაკის მაგივრად ვითარდება ნამდვილი გრძელი ფხა, ფხები გრძელი და თითქმის პარალელურად განწყობილი. მარცვალი წითელი, წვრილი ოვალური ფორმის, არა ღრმა ღარით, რქისებრი კონსისტენციის. 1000 მარცვლის მასა 28–32 გრამია. ჟანგას ყველა სახეობის მიმართ გამძლეა. ნაკლებად ავადდება მტვრიანა გუდაფშუტით.
დღევანდელი მდგომარეობა: ამჟამად ჯიში შესაძლებელია დაცული იყოს საქართველოს აგრარული უნივერსიტეტის ან სხვა უცხოურ გენბანკებში.
წყარო: პ. ნასყიდაშვილი, მ. სიხარულიძე, ე. ჩერნიში – ხორბლის სელექცია საქართველოში, თბილისი 1983 წ. გვ. 71; საქართველოს მთიანეთის სოციალურ–ეკონიკური განვითარების პრობლემები და მათი გადაჭრის გზები – საქ, მეცნიერებათა ეროვნული აკადემია, თბილისი, 2010 წ. გვ. 324