წყალწითელა ბარდა
საზოგადო სახელი: ბარდა
სახეობის სახელწოდება: Pisum sativum L.
ქვესახეობის სახელწოდება: subsp. sativum convar. medullosaccharatum (Körn.) Lehm.
ჯიშის სახელწოდება: წყალწითელა Pisum sativum convar. medullosaccharatum 'Tskaltsitela'
წარმოშობა: წყალწითელა სელექციური ჯიშია, გამოყვანილია ქუთაისის მებოსტნეობის სასელექციო საცდელ სადგურში, ჯიშ „კონიოკ გორბუნოკიდან“ ინდივიდუალური, მრავალჯერადი გამორჩევის გზით. 1977 წლიდან დარაიონებულია, როგორც საპარკე ჯიში საქართველოში.
ჯიშის დახასიათება: საგვიანო ჯიშია, აღმოცენებიდან ტექნიკურ სიმწიფემდე სჭირდება 73-80დღე, ხოლო ფიზიოლოგიურ სიმწიფემდე 90-100 დღე. მაღალმოზარდია, უხვად შეფოთლილია, ღეროს სიგრძე - 100-150 სმ, ახლად აღმოცენებული ღერო ღია იასამნისფერია. ფოთოლი ჩვეულებრივი ტიპისაა, საკმაოდ დიდი: 10-13 სმ სიგრძის და 8-10 სმ სიგანის, ულვაშით ბოლოვდება, ფოთლის ნერვაცია ღია იასამნისფერია. ყვავილი მსხვილია, მუქი იასამნისფერი, ყვავილსაჯდომი მწვანეა, ღია იასამნის ელფერით, რომელზეც ზის 1-2 ყვავილი. პარკი ტექნიკურ სიმწიფეში სუსტადაა მოხრილი, საკმაოდ დიდი ზომისაა, სიგრძე 9-12სმ, სიგანე 2-3სმ. მცენარეზე 2-7 პარკია, თითოში 6-8 მარცვალია. პარკი ხორციანია უპერგამენტო. ჰა-ზე იძლევა 12-14ტ მწვანე პარკს. მარცვალი მსხვილია, დანაოჭებული, ღია ყავისფერ ფონზე იისფერი წინწკლებით. ლებნები ღია ყვითელია, 1000 მარცვლის მასაა 240-300 გრ.
დღევანდელი მდგომარეობა: არ არის დაზუსტებული ინფორმაცია.
დამატებითი ინფორმაცია: სადესერტო ჯიშია, საბოსტნე, საშაქრე მიმართულების. დაავადებების მიმართ საკმაოდ გამძლეა.
წყაროები: შოთა ობოლაძე, საბოსტნე პარკოსანი კულტურები, გამომცემლობა „საბჭოთა საქართველო“, თბილისი, 1984 წ.