გომბორულა ხორბალი
საზოგადო სახელი: ხორბალი
სახეობის სახელწოდება: Triticum aestivum L.
ჯიშის სახელწოდება: გომბორულა - Triticum aestivum ‘Gomborula’
გავრცელება: გომბორულა აღმოსავლეთ საქართველოს ადგილობრივი ჯიშია. ძირითადად გავრცელებულია კავკასიონის ჩრდილო და სამხრეთ ფერდობებზე, მაგრამ გვხვდება კახეთის სხვა კუთხეებშიც.
ჯიშის დახასიათება: საგაზაფხულო ფორმაა, მაგრამ ითესება ძირითადად შემოდგომით. ამ პოპულაციისათვის დამახასიათებელია წვრილი, საკმაოდ გრძელი, თითისტარისებრი თავთავი. ნაკლები ცვენადი მარცვლით. ამ ჯიშისათვის ტიპიურია თავთავის ზედა ნაწილში 2–3 სმ. სიგრძის ფხისმაგვარი დანართები. თავთუნის კილი ფართოა, ან კვერცხისებრი ფორმის, მოკვეთილი მხრით. თავთუნის კილის კბილაკი მოკლე და ბლაგვია, მარცვალი საშუალო სიდიდის ან წვრილი, 1000 მარცვლის მასა 30 გრამია. ღერო მაღალია, მაგრამ არ წვება. ბარტყობის უნარი მაღალია. შეფოთვლა საკმაოდ ძლიერი. ფართოფოთლიანია. საგაზაფხულო ფორმაა მაგრამ ითესება ძირითადად შემოდგომით. ხასიათდება მაღალი ცხობისუნარიანობით და შედარებით გამძლეა სოკოვანი დაავადებების მიმართ. ხასიათდება მაღალი ადაპტაციის უნარით, გამძლეობით სოკოვანი დაავადებების და ჩაწოლის მიმართ.
დღევანდელი მდგომარეობა: ამჟამად ეს ჯიში შესაძლებელია დაცული იყოს საქართველოს აგრარული უნივერსიტეტის ან სხვა უცხოურ გენბანკებში.
წყაროები: პ. ნასყიდაშვილი, მ. სიხარულიძე, ე. ჩერნიში ხორბლის სელექცია საქართველოში. თბილისი 1983
В. Л. Менабде Пшеницы Грузии - Тбилиси 1948
The International Plant names Index http://www.ipni.org/
Wheat Genetic and Genomic Resources Center TRITICUM CLASSIFICATION SYSTEMS http://www.k-state.edu./wgrc/Taxonomy/taxtrit.html