საქართველოს აგრარული ბიომრავალფეროვნება

მოკლე აღწერა: თავი საშუალო ზომის და შებუსული აქვს. პროფილი ნერბებში სწორია, ვერძებში ოდნავ კეხიანია, ყურები საშუალო სიდიდის, რქები ვერძებში გრძელი და სპირალისებრად დაგრეხილია; ნერბები ძირითადად დოლაა, ზოგიერთ ინდივიდებში კი შეინიშნება მოკლე რკალისებრი ფორმის რქები. ცხოველებს სხეული საშუალო სიგრძის და ჰარმონიულად განვითარებული აქვთ: ზურგისა და წელის ხაზი სწორი, მკერდი ღრმა და განიერი, ფეხები გრძელი და შედარებით მსხვილი, ჩლიქები კი მაგარი. დამახასიათებელია ფართო და ოდნავ დაქანებული გავა, რომელიც მთავრდება კარგად განვითარებული ცხიმკუდით. ზრდასრული ნერბების ცოცხალი მასა 35-45 კგ, ვერძებისა 60-70 კგ, ახალშობილი ბატკნისა - 2,5-3 კგ. 3,5-4 თვის ასაკში ასხლეტილი ბატკნის წონაა 12-19 კგ. შემოდგომაზე, მთიდან გადმორეკვის წინ კი 25-35 კგ; ნაიალაღარი თოხლისა და 1,5 წლის ჭედილის ნაკლავის გამოსავალი 43-48%-ის, ზრდასრული ცხვრისა კი 40-47%-ის ფარგლებში ცვალებადობს. ვერძების წლიური ნაპარსი 4-5 კგ-ის, ნერბების 2,5-3,5 კგ-ის, ხოლო ბატკნის შემოდგომის ნაპარსი 0,8-1,2 კგ-ის ტოლია. კულულის საშუალო სიგრძეა 11-16 სმ (მაქსიმალური 30 სმ- მდე). თივთიკისა - 6,5-9 სმ, გარდამავალი ბოჭკოების კი 7,5-10,5 სმ-ია. მატყლი ფრაქციული შედგენილობითა და სინაზით ნახევრად უხეშ მატყლს უახლოვდება, შეიცავს დიდი რაოდენობით გარდამავალ ბოჭკოებს, ფერად თეთრია, გამოირჩევა სიმაგრით, დრეკადობით, ელასტიკურობით და ბზინვარებით (ლუსტროვნობით). საუკეთესო ტექნოლოგიური თვისებების გამო ის გამოიყენება ხალიჩებისა და სხვადასხვა ქსოვილის დასამზადებლად. ნერბების ნაყოფიერება 100-105%-ია, ლაქტაციის ხანგრძლივობა 150-170 დღე, ხოლო სარძეო პროდუქტიულობა 45-75 კგ (რეკორდული მაჩვენებელია 165 კგ). რძის უმეტესი ნაწილი ხმარდება ბატკნის გამოზრდას, ხოლო სასაქონლო რძის რაოდენობა 15-20 კგ-ია. რძისაგან ამზადებენ გუდის ყველს.