საქართველოს აგრარული ბიომრავალფეროვნება

საზოგადო სახელი: მურწა ლათინური დასახელება: Barbus mursa სახეობა: მურწა წარმოშობა: მურწა წარმოადგენს სამხრეთ კავკასიის ენდემურ ფორმას. კობრისებრთა ოჯახის წარმომადგენელია. შიდა ქართლსა და კახეთში ციმორს უწოდებენ. გავრცელების გეოგრაფია განისაზღვრება: საქართველო, სომხეთი, აზერბაიჯანი, თურქეთი და ირანი. მტკნარი წყლის თევზია. რეოფილური ფორმაა, საბინადროდ ამჯობინებს მდინარის ჩქარ, ქვაქვიშიან ადგილებს და ნაკლებად ეგუება მდგარ წყლებს. დღევანდელი მდგომარეობა: გვხვდება აღმოსავლეთ საქართველოში, მტკვრის აუზის ყველა მდინარეში: ხრამში, არაგვში, ქსანში, ლიახვში, ფოცხოვში, იორში, ალაზანსა და მის შენაკადებში (ილტო, ხევისჭალა, სტორი, ლოპოტა, ჩელთი, დურუჯი, ბურსა, კაბალი), აგრეთვე ჯანდარის ტბაში, შედარებით ნაკლებადაა სიონის, თბილისისა და პალდოს წყალსაცავებში. უმეტეს მდინარეებში გავრცელებულია მთელ სიგრძეზე. ძალიან გემრიელი და ძვირფასი თევზია, მაგრამ რაოდენობრივი სიმცირის გამო ნაკლები სარეწაო მნიშვნელობა აქვს. სპორტული თევზჭერის საკმაოდ კარგი და საინტერესო ობიექტია. წყაროები: : საქართველოს მტკნარი წყლის თევზები (ატლასი). თბილისი,"მეცნიერება",1970; საქართველოს თევზები - კრებული , გამომცემლობა: „წიგნი+ერი“, 2013; http://www.geofauna.ge/tevzebis%20samyaro/tevzis%20jishebi%20saqartveloshi/murca/murca.html (18.01.2014); М. Деметрашвили, Промысловые рыбы пресных вод Грузии. АН ГССР, „Мецниереба“, Тбилиси, 1963; Эланидзе Р. Ф., Ихтиофауна рек Грузии. Тбилиси, "Мецниереба", 1983.