საქართველოს აგრარული ბიომრავალფეროვნება

ჯიშის დახასიათება: ჯიში ფშავი საადრეო მომწიფებისაა, აღმოცენებიდან ნაყოფის დამწიფებამდე სჭირდება 103–115 დღე. მცენარე ნახევრად დეტერმინანტული ფორმისაა, ჩაწოლას არ განიცდის, საშუალო სიმაღლის, მთავარი ღეროს სიმაღლეა 45–75 სმ. ფოთოლი მუქი მწვანე ფერისაა, მცირედ გოფრირებული, საშუალო ზომის, სუსტად დანაკვთული. ყვავილედი მარტივია, ბუჩქზე გვხვდება მჭიდრო კომპაქტური ტიპის რთული ყვავილედებიც. პირველი ყვავილედი ვითარდება მე–7, მე–8 ფოთლის შემდეგ. მომდევნო ყვავილედები ერთი–ორი ფოთლის შემდეგ. მთავარ ღეროზე ივითარებს 5–6 ყვავილედს. ყვავილედზე ნაყოფების რაოდენობა 4–5 ცალია. ნაყოფის ფორმა მომრგვალო–ბრტყელია, ოდნავ მოგრძო გლუვი წახნაგებით. უმწიფარი ნაყოფები ღია მწვანე ფერისაა, სრულ სიმწიფეში - მუქი წითელი, გლუვი ზედაპირით, ნაყოფის ბუდიანობა 4–დან 6–მდეა.
ნაყოფის საშუალო მასაა 80-130 გრ. სადეგუსტაციო შეფასება - 4 ბალი. მშრალი ნივთიერება - 5,6–6,8%, შაქრიანობა - 3,8–4,3%, მჟავიანობა - 0,47–0,53%, ასკორბინის მჟავას შემცველობა - 14,4–25,5 მგ%, მოსავალი - 47,0 ტ/ჰა.
გამოყვანილია მიწათმოქმედების სამეცნიერო–კვლევით ინსტიტუტში გამა დასხივებით /დოზა 20 კრ./ ჯიშ პერემოგა 165–დან.