სამსუნი 959 (სოხუმის სამსუნი) თამბაქო
სახესხვაობის სახელწოდება: Nicotiana tabacum var. fruticosa (L.) Hook. f.
ჯიშის სახელწოდება: სამსუნი 959 (სოხუმის სამსუნი) - Nicotiana tabacum fruticosa ‘Samsuni 959 (Sokhumis Samsuni)’
წარმოშობა: სამსუნი 959 გავრცელებულია აფხაზეთის დაბალ და საშუალო ზონაში. გამოყვანილია აფხაზეთის თამბაქოს საცდელ სადგურში, ჰიბრიდიზაციის წესით (სამსუნი 1857 და სამსუნი 27-ის შეჯვარებით).
ჯიშის დახასიათება: საადრეო ჯიშია. სავეგეტაციო პერიოდი გადარგვიდან ყვავილობის დაწყებამდე 78-80 დღეა. გადარგვიდან სრულ სიმწიფემდე - 90-114 დღე. იძლევა საპაპიროსე არომატულ და გემოვან ნედლეულს. მცენარის ფორმა ცილინდრულია, 140-180 სმ სიმაღლის. ფოთოლი ყუნწიანია, კიდემთლიანი, მიმაგრება ზეაღმართულია, მოყვანილობა - გულისებრი. ფოთლის ფუძის დანამატი – ბიბილო პატარაა, ოდნავ დანაოჭებული. მცენარე მრავალფოთოლიანია - ივითარებს 40-50 ფოთოლს, ფოთლის სიგრძის შეფარდება სიგანესთან 1,5-1,7:1 ნერვაცია ნაზია. ყვავილი ვარდისფერია, საშიალო ზომის. სამსუნ 27-თან შედარებით, 10-12 დღით საადრეოა და 20-25%-ით მეტ მოსავალს იძლევა - 1,6-1,8ტ/ჰა. სამსუნ 27-ს სჯობნის გვალვაგამძლეობით.
დღევანდელი მდგომარეობა: შესაძლებელია დაცული იყოს აგრარული უნივერსიტეტის მცენარეთა გენეტიკური რესურსების ბანკში, ასევე რუსეთის ვავილოვის სახელობის მემცენარეობის ს/კ ინსტიტუტში (VIR).
დამატებითი ინფორმაცია: აფხაზეთის დაბალ და საშუალო ზონაში იძლევა მუქ ნარინჯისფერ ნედლეულს. სასაქონლო ღირებულებებით (გამოსავლიანობა, გემო, არომატი) არ ჩამოუვარდება სამსუნ 27-ს.
წყაროები: ბ გაბუნია, ნ. ჩხენკელი, ა. ჯაფარიძე, მემცენარეობა, თბილისი, 1959 წ.